FBI dhe NSA: Nuk ka konfirmim për pohimet e Trampit për përgjim

Drejtori i Byrosë Federale të Hetimeve (FBI) Xhejms Komi, konfirmoi se agjencia e tij ka hetuar në mënyrë aktive përpjekjet ruse për të ndërhyrë në zgjedhjet amerikane, përfshirë ndonjë koordinim të mundshëm me fushatën e Donald Trampit, transmeton MIA.

Komi po ashtu tha se nuk ka informacione që mbështesin akuzat e Presidentit Donald Tramp se ish-presidenti Barak Obama kishte përgjuar zyrat në “Trump Tower” (Kulla Tramp) vetëm disa javë para zgjedhjeve presidenciale nëntorin e kaluar.

“Nuk kemi informacione që të mbështesin sa është thënë në postimin e presidentit Trump”, ka thënë Komi duke iu referuar akuzave të miliarderit se, Obama kishte përgjuar rezidencën e tij, “Trump Tower”.

Shefi i FBI-së ka bërë gjithashtu me dije se, zyra e tij po heton edhe për lidhje të mundshme të stafit elektoral të Donald Trump me Rusinë, gjatë zgjedhjeve të vitit 2016.

Qëndrimin e njëjtë, sipas pohimeve të Komit, e ka edhe Ministria amerikane e Drejtësisë që i mbikëqyr FBI-n dhe agjencitë tjera.

Ndërkohë, kryetari i komisionit, republikani Dejvid Nunes ka ritheksuar se nga verifikimet e kryera ka rezultuar se nuk ka pasur përgjime “fizike” pranë “Tramp Tower”.

Megjithatë, ai ka shtuar se, është e mundur që aktivitete të tjera përgjimi të jenë kryer ndaj Tramp dhe bashkëpunëtorëve të tij.

Ndërsa demokrati Adam Shif, bashkëkryetar i komisionit, ka thënë se, Komi tashmë është në gjendje “të mbyllë përfundimisht” diskutimet në lidhje me akuzat për përgjimet.

Komi dëshmoi sot para Komisionit për Shërbimet e Zbulimit të Dhomës së Përfaqësuesve së bashku me shefin e Agjencisë së Sigurisë Kombëtare, Admiralin, Majkëll Roxhers, i cili e hodhi poshtë sugjestionin e administratës së Tramp se NSA ka kërkuar nga agjencitë britanike të inteligjencës që ta spiunojnë presidentin e SHBA-së.

Ai shtoi se qëndron tërësisht prapa raportit të shërbimeve të inteligjencës, kur bëhet fjalë për implikimin e Rusisë në fushatën parazgjedhore të vitit të kaluar.

Leave a Reply

Your email address will not be published.

*

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

VERZIONI DESKTOP