MOS LUANI MAJTAP!

Fatmir Sulejmani

Fatmir Sulejmani

Në rrethana mesjete si këto të vendit të çudirave, kur turma njerëzish të dëshpëruar mjerimesh kërkojnë lirinë e tyre, duke uzurpuar lirinë dhe të drejtat e tjetrit, poeti shkruajti:

Askush mos të harrojë se asht njeri:
ju le nuk keni për t’gjallue si shtazë,
po për të ndjekë virtyt e dituni…

Pa dyshim, kjo klithmë prometeike zhvesh dhe sot fqinjin tim dhe rrënon iluzionin e të ardhmes së përbashkët me të.

Ç’pamje makabre!

Akademikë, klerikë, aktorë, shkrimtarë, filozofë, mjekë, piromanë luftënxitës, jevgjitë me daulle zhurmëmëdha dhe këngë mbi kletite shiptari!

Ku e ka burimin gjithë ky mllef, Perëndi?! Kulti mbi sëpatat, zjarret dhe komorat e gazit?! Kush i orkestron britmat e paartikuluara të mjerimit, fashizmin akademik, fiksidetë donkishoteske, ëndrrat e qelbura prehistorike?!

Keq, për Zotin!, sepse askush nuk e di sa do të zgjasë gërdia dhe si do të përfundojë groteska në regjinë e mbretit sharlatan? Sa do të jetojë makoastma e quajtur albanofobi dhe polifemi shqiptar që ia prish gjumin miletit antik?

Për ata që akoma s’janë goditur nga damllaja e syve, Platoni i urtë tha: Për njeriun është më i dashur shteti që ofron më shumë të drejta, liri dhe të mira të tjera… Së këndejmi, edhe laraskat e kanë të qartë se shqiptarët nuk mund të jenë lojalë (në fakt: nuk u lejohet) ndaj shtetit i cili i gudulis xhelatët e tyre potencialë – tifozët e komorave të gazit. Prandaj, nëse projektet për zhbërjen e të mallkuarve dhe marshet e rikomponuara të luftës do të vazhdojnë të trajtohen si lodra fëmijësh, atëherë dihet: do ta detyrojnë edhe shqiptarin më të fjetur nga ninullat e vëllazërimbashkimit të ecë rrugës së tij, sepse, dorën në zemër: në stinën e gjuetisë legale të indianëve, më shumë josh kalldërma e keqe se sa udha fluide e parajsës…

Ekziston një dallim ndërmjet dy bashkësive të vendit të çudirave, të cilin shqiptari i thjeshtë e shpjegon troç: ne nuk i duam – ata na urrejnë. Dakord: mbase kjo është karakteristikë e akujve mentalë të Ballkanit, ama ndërmjet të mos e duash dhe ta uresh, ka koxha dallim, ashtu siç ka dallim ndërmjet betejës politike për të drejtat e mohuara padrejtë­sisht dhe ulërimave histerike kundër gjuhës, kulturës dhe ekzistencës fizike të tjetrit, bashkëqytetarit, bashkëvendësit.

Dikush duhet të vajtohet me gajde, apo?!

Paramendoni! Të urtit, që në shekullin e IX, arritën t’i bindin bizantinët, latinët dhe hebrenjtë për budallallëkun e përmbledhur në idenë e tri gjuhëve hyjnore të Zotit, ndaj çfarë t’u thuhet sot kokëkrisurve që e ruakan gjuhën e tyre ­hyj­nore duke bërë zap gjuhën shqipe – njërën ndër më të lashtat dhe më të veçantat e kontinentit evropian?!

Do ma lejoni supozimin: mos luani majtap!

Shkrimi është shkruar enkas për Portalb.mk. Të drejtat e publikimit i kanë vetëm ©Portalb.mk dhe autori, sipas marrëveshjes mes tyre

Leave a Reply

Your email address will not be published.

*

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

VERZIONI DESKTOP