Hekurudha edhe më tej e bllokuar
Të punësuarit në Hekurudhat e Maqedonisë, të cilët protestojnë me bllokadë në komunikacion hekurudhor tani më dy javë me radhë, u takuan me u.d drejtorin e HM Transport Igor Korunoski, por ende nuk është arritur marrëveshje për ndërprerje të protestës.
Sipas Korunoskit, kontaktet me të punësuarit do të vazhdojnë dhe kërkohet zgjidhje që gjatë ditës të fillohet me punë.
“Sërish është ofruar zgjidhja që u prezantua dje, menjëherë të paguhet pjesa e parë e pagës së janarit dhe sigurimi shëndetësor dhe të fillojë me grumbullimin e mjeteve për pjesën e dytë. Të punësuarit kërkojnë informacion dhe garanci për pjesën e dytë të pagës. Kemi kontakte me të punësuarit dhe kërkohet zgjidhje që gjatë ditës të fillohet me punë”, deklaroi për MIA-n Korunoski.
Për shkak të protestës së të punësuarve në HM, 15 ditë tërësisht është ndërprerë qarkullimi i mallrave dhe i udhëtarëve në Maqedoni.
Korunoski dje apeloi që të punësuarit të fillojnë me punë, duke theksuar se vetëm kështu do të mund të faturohen paratë për pagën përmes Ministrisë së Transportit dhe Lidhjeve.
