Lëvizja BESA: Deklarata e KOM-it është shkelje flagrante e sekularizmit në shtet

Lëvizja BESA përmes një komunikate me shkrim për mediat sot ka reaguar rreth prononcimit të Kishës Ortodokse Maqedonase, e cila ka bërë apel deri te liderët politikë që ta ruajnë pozicionin kushtetues të gjuhës maqedonase në gjithë territorin e Republikës së Maqedonisë, gjë që është në pajtim me Kushtetutën dhe karakterin unitar të shtetit.

BESA në kumtesë shton se që gabimi i KOM-it të duket akoma më skandal, ata në komunikatë kanë deklaruar “se populli duhet të udhëhiqet prej vlerave ungjillore krishtere”, madje Kisha Ortodokse Maqedonase e konsideron veten si nënë shpirtërore e të gjithë besimtarëve ortodoksë dhe të gjithë të tjerëve, pavarësisht nga përkatësia etnike.

“Në këtë kohë të brishtë politike, kur duhet të ruhet qetësia, stabiliteti dhe harmonia mes komuniteteve etnike dhe fetare, kur ka një amulli se si do jetë fati i së ardhmes së këtij shteti multietnik dhe multifetar dhe kur të gjithë presin me padurim që të rikthehet sundimi i ligjit dhe përfundimisht të kemi një qeveri politike stabile, papritmas shpërthen edhe një rrufe skandaloze, që nuk arrin asgjë, përpos që shkakton tensione dhe e rrit mosbesimin e qytetarëve në vend, shton BESA në kumtesë.

Kështu, sipas BESË-s Sinodi i Shenjtë i Kishës Ortodokse Maqedonase – Kryepeshkopata e Ohrit (KOM-KO), për të satën herë radhazi e shkelë rregullin bazë të sekularizmit të shtetit, që ua ndalon komuniteteve fetare të përzihen në punët e brendshme të shtetit.

Të përzihet një bashkësi fetare në interpretime kushtetuese për përdorimin gjuhëve zyrtare ose të deklarohet se shteti duhet të udhëhiqet prej vlerave ungjillore, kjo, sipas BESË-s padyshim se është tendencioze dhe fyese për popullin shqiptar, i cili është me shumicë absolute myslimane dhe autokton në këtë vend, ndërsa të vazhdosh më tutje dhe të thuash se Kisha ka përgjegjësinë prindërore ndaj të gjithë besimtarëve pa dallim feje, kjo është përtej të gjitha kompetencave dhe ofenduese për të gjithë besimtarët e feve të tjera.

Prandaj Lëvizja Besa duke u bazuar në nenin 19, amendamenti 7 të Kushtetutës, që thotë se “Kisha Ortodokse Maqedonase, si dhe Bashkësia Fetare Islame në Maqedoni, Kisha Katolike, Kisha Evangjeliste-Metodiste, Bashkësia Hebraike dhe bashkësitë e tjera fetare dhe grupet religjioze, janë të ndara nga shteti dhe janë të barabarta para ligjit”, e dënojmë këtë deklaratë tendencioze dhe i bëjmë thirrje KOM-it që së paku duke u bazuar në parimet fetare që i proklamon vetë ortodoksizmi, se “ndryshimi duhet të fillojë prej vetes”, që ta respektojë kushtetutshmërinë e shtetit dhe të mos e rrënojë parimin sekular të shtetit, sepse përzierja e tillë sjellë pasoja të cilat askush nuk do t’i dëshironte në këtë vend.

“Nëse kjo krizë e thellë politike merr edhe nuanca religjioze, pasojat e saj nuk mund të parashikohen”, shtohet më tej në kumtesën e Lëvizjes BESA.

LEXO: Kisha Ortodokse e Maqedonisë porosit që të ruhet uniteti i shtetit

Lajme të ngjashme

Leave a Reply

Your email address will not be published. Required fields are marked *

Back to top button