Meta: Kosova ta ratifikojë Marrëveshjen për demarkacion me Malin e Zi
Kryetari i Kuvendit të Shqipërisë, Ilir Meta, në takimin me homologun e tij nga Kosova, Kadri Veseli, i cili po qëndron për vizitë zyrtare në Shqipëri, u shpreh se institucionet e Kosovës kanë mbështetjen e Shqipërisë në rrugën drejt integrimit.
Në takim, siç njoftojnë mediat kosovare, është biseduar edhe për integrimin e Kosovës në organizatat e sigurisë si dhe për demarkacionin me Malin e Zi.
“Mbështesim miratimin pa ekuivok të marrëveshjes së demarkacionit të Kosovës me Malin e Zi, për të përfituar liberalizimin e vizave dhe për të ecur në rrugën e integrimit evropian të Kosovës, por edhe për të përfunduar anëtarësimin e Malit të Zi në NATO. Ne mbështesim integrimin evropian të Kosovës, e kemi për detyrë dhe ky është interesi i të gjithë shqiptarëve. Kemi edhe një argument tjetër, ne pa Kosovën nuk mund të kishim vajtur në evropianin e Francës. Ti jepet fund një lloj stanjacioni atje dhe mendoj se do të marrë fund ky stanjacion, shpresoj me marrëveshjen e demarkacionit me Malin e Zi. Dhe e dyta për të zhbllokuar procesin e liberalizimit të vizave”, tha Meta.
Meta, në konferencën e përbashkët për shtyp, tha se dialogu me Serbinë duhet patjetër të mbështetet nga të gjithë, ndërsa ka shprehur keqardhje për ndalimin e papranueshëm të ish-kryeministrit Ramush Haradinajt në Francë.
Ndërsa Kryetari i Kuvendit të Kosovës, Kadri Veseli u shpreh se Shqipëria është përkrahëse në çdo proces, si si në integrimin euro-atlantike. “Kosova është duke punuar fuqishëm që të ketë perspektivë në Kosovë në një shtet me të drejta të garantuara me liri ekonomike, ku të drejtat e njeriut janë bazë për ne”, tha Veseli.
Ai shtoi se Kosova do t’i përmbush obligimet e veta dhe partnerët evropianë të saj do ta bëjnë rrugëtimin e drejtë, aty ku i takon në BE, pa pengesa, që shpesh janë të natyrës burokratike, por edhe politike nga disa shtete.
Pas takimit me kryeparlamentarin Ilir Meta, Veseli do të pritet në takime të veçanta nga udhëheqësit më të lartë të institucioneve shtetërore, Presidenti Bujar Nishani, kryeministri Edi Rama dhe kryetari i opozitës, Lulzim Basha.
