Melania Trump fillon punët e shtëpisë…së Bardhë, synime për të ndryshuar dhomat historike
Melania Trump po fillon të sillet si zonja shtëpie në Shtëpinë e Bardhë. Us Weekly shkruan që ajo ka zgjedhur dizajneren për ridekorimin e shtëpisë, ajo është Tham Kannalikham, dizajnere interieri nga NewYork-u.
Dizajneria me origjinë nga Laosi, që e ka filluar në Ralph Lauren Home, tani zotëron firmën e saj të quajtur Kannalikham Designs. “Është nder të punoj me Zonjën e Parë për ta bërë Shtëpinë e Bardhë të ngjajë si shtëpi”, ka thënë Kannalikham në një deklaratë të enjten.
Kannalikham njihet për punën me klientët privatë nga e gjithë bota dhe është mjeshtre e të mbajturit të një profili të panjohur gjerësisht. Faqja e kompanisë së saj ka një login privat vetëm për klientët dhe nuk ka asnjë foto. Faqja kryesore ka vetëm informacionet e kontaktit. Kannalikham gjithashtu nuk do të shfaqet publikisht as në llogaritë e sa private, ajo e ka Instagramin e mbyllur dhe faqen e Linkedin-it shumë bazike.
Nuk është e qartë sesi janë takuar Kannalikham dhe Melania, por bashkëpunimi i Kannalikham-t me Ralph Lauren mund të ketë qenë një nxitje për Melania-n, e cila u vesh me Ralph Lauren ditën e përurimit.
Aktualisht, Zonja e Parë ndodhet në Kullën Trump në New York, por do të shkojë në Shtëpinë e Bardhë në fund të vitit shkollor dhe do të vazhdojë ta ndajë kohën mes Shtëpisë së Bardhë dhe New York-ut, sipas US Weekly. Qëllimi kryesor për ridekorimin e Shtëpisë së Bardhë do të jetë krijimi i një atmosfere shtëpiake për djalin 10 vjeç të Trump, Barron. Hapësirat e tjera të Shtëpisë së Bardhë që do të ridekorohen do të jenë Dhoma e Gjumit Lincoln, Dhoma e Ngrënies së Presidentit, Ballkoni Truman, Dhoma e Verdhë Ovale dhe Dhoma e Pushimit në katin e dytë. Megjithatë është e vështirë të ndryshosh disa nga dhomat historike të Shtëpisë së Bardhë. Dhoma e Gjumit Lincoln dhe dhoma shtetërore e ngrënies mbrohen nga Komiteti i Ruajtjes së Shtëpisë së Bardhë. Zonja e Parë duhet të kërkojë aprovim për të ridekoruar këto dhoma historike.