Ymeri nuk pajtohet me qëndrimin e Durmishit për mediat

”Nuk dua ta arsyetoj e as ta mbroj Hysenin. Nuk pajtohem me qëndrimin e tij”, është shprehur Ymeri

Kryetari i Lëvizjes Vetëvendosje, Visar Ymeri ka dhënë versionin e vet se pse Hysen Durmishi ka thënë se kur partia e tij të vije në pushtet do t’i ngrehë zvarrë mediet.

Ymeri përmes një postimi në facebook është shprehur se nuk dëshiron as ta mbrojë dhe as ta arsyetojë Durmishin, madje ka shtuar se nuk pajtohet me qëndrimin e tij, transmeton 21 Media.

”Kur e humbet një bashkëveprimtar, një shok shumë të mirë siç ishte Astriti, pikëllimi dhe revolta bëhen të pashmangshme. Ka momente kur secili nga ne, shokët dhe shoqet e Astritit, nën këtë pikëllim e revoltë mund të bëjmë deklarata që nuk përputhen me atë për të cilën në të vërtetë qëndron dhe përpiqet Lëvizja VETËVENDOSJE!. Në këtë drejtim e kategorizoj edhe statusin e djeshëm të Hysen Durmishit. Me këtë as nuk dua ta arsyetoj e as ta mbroj Hysenin. Nuk pajtohem me qëndrimin e tij. Tërheqja zvarrë e asnjë mediumi nuk është mjet për të cilin angazhohet VETËVENDOSJE! Lufta jonë politike është kundër regjimit kriminal që i ka kriminalizuar institucionet shtetërore përmes kapjes”, ka shkruar Ymeri.

Ai është shprehur se në Kosovën që do të qeveriset nga Vetëvendosje do të ketë liri të plotë mediale, ngase nuk mund të ketë demokraci të vërtetë pa qenë e garantuar e drejta e qytetarëve që të informohen drejt.

”Njëkohësisht jam absolutisht kundër mënyrës se si media të caktuara e keqkuptojnë dhe keqpërdorin lirinë e shprehjes. Mediet që shpifin dhe rëndojnë poshtërsisht familjen Dehari dhe shokët e shoqet e Astritit, duhet të kenë parasysh ligjet dhe kodet etike të gazetarisë. Kjo do të ishte në të mirën e vetë gazetarisë dhe lirisë së medies. Liria e medieve është një nga shtyllat e programit tonë dhe tentimet për kufizim të kësaj lirie nga pushteti, janë vazhdimisht në qendër të kritikave tona. Në Kosovën që do të qeveriset nga VETËVENDOSJE! do të ketë liri të plotë mediale, ngase nuk mund të ketë demokraci të vërtetë pa qenë e garantuar e drejta e qytetarëve që të informohen drejt”, ka shkruar më tutje Ymeri.

Ndryshe, Hysen Durmishi nga VV ksihte shkruar një postim në facebook ku ishte shprehur se bashkë me pushtetin aktual do t’i largojnë zvarrë edhe mediat.

Lajme të ngjashme

Leave a Reply

Your email address will not be published. Required fields are marked *

Back to top button