Ende nuk ka tender për ndërtimin e Bibliotekës së Tetovës
Blerona Jakupi
Biblioteka e Tetovës vazhdon punën e ngulfatur nga librat derisa jemi duke pritur të realizohet projekti i ndërtimit të objektit të ri, premtim i kamotshëm i kryetarëve të komunës së këtij qyteti që sipas planit duhet të fillojë të ndërtohet në prill të këtij viti.
Qeveria ende nuk ka vendosur të hapet tenderi për ndërtimin e saj.
Procesi mësimor kërkesat e ndryshme sipas plan-programeve, është njëra nga arsyet bazë që të rinjtë shkelin në dyert e bibliotekës. Megjithatë, ky institucion i rëndësishëm kulturor po frekuentohet edhe nga lexuesit e rëndomtë.
Biblioteka e qytetit në Tetovë e cila zë një hapësirë vetëm prej 200 m2 është e pasur me një fond prej 1700 titujsh të cilat i përkasin zhanreve të ndryshme letrare.
Kjo bibliotekë, sipas drejtoreshës Fitore Reshiti ka rreth 5 mijë anëtarë prej të cilëve 2.300 janë fëmijë dhe 2.700 i përkasin grup-moshës së të rriturve. Sipas saj, këto të dhëna e radhitin bibliotekën në një nga më të lexuarat në Maqedoni.
Numrin më të lartë,nga ato që frekuentojnë bibliotekën përbëjnë gjimnazistët ,kjo si rezultat i hapjes së drejtimeve të profilizuara.
Drejtoresha e bibliotekës vë në dukje se kërkesat e lexuesve janë të larta në krahasim me ofertat.
“Megjithatë, mundohemi t’i përmbushim ato kërkesa “vijoi ajo.