Fadil Vokrri: U vu drejtësia e vonuar – Arritje e jashtëzakonshme
Kryetari i Federatës së Futbollit të Kosovës, Fadil Vokrri, ka dhënë një prononcim për media pas pranimit të Kosovës në UEFA.
Vokrri edhe pse i emocionuar u tregua i matur dhe vigjilent në deklarata, falënderoi të gjithë , edhe miqtë që bën obstruksione.
Legjenda e futbollit kosovar tha se tani rruga është e hapur edhe për anëtarësimin javën e ardhshme në organizatën më të madhe të futbollit në botë – FIFA
“Më në fund u vu një drejtësi pakëz e vonuar, megjithatë duke marr parasysh bllokadat ligjore që u munduan serbët t’i bëjnë. Kjo është një arritje e jashtëzakonshme e të gjithëve, përfshi edhe mediat. Momentet kanë qenë mjaft të vështira, duke parë kahjen që i dhanë disa shtete që i konsiderojmë miq, pavarësisht kësaj ne i konsiderojmë miq prapë edhe pse pat obstruksione.”
“Kemi pasur frikë se mos po tërhiqet pika për votimin e Kosovës, por jemi siguruar nga zyra ligjore se pika e votimit është e ndarë. Kemi pas në mendje edhe UNESCO-n. Mund të themi se e kemi rrugën e mirë përpara edhe për FIFA javën e ardhshme në Mexico City,” ka thënë Vokrri, njofton Klan Kosova.
