Nusja kosovare, foto e ditës në “National Geographic”

Fotografia e Nita Zeqirit është përzgjedhur nga magazina prestigjioze për veçantinë dhe mesazhin që përçon ajo për publikun.

Fotografia “Nusja” nga Kosova e realizuar nga Nita Zeqiri është zgjedhur Foto e Ditës nga revista prestigjioze “National Geographic”.

Foto pasqyron një traditë të vjetër mbi një mijë vjeçare që është përcjellur brez pas brezi deri në ditët e sotme në Lubinjën e Poshtme të zonës së Zhupës së Prizrenit.
Siç përshkruan “National Geographic” sot, kjo traditë është në prag të zhdukjes, pasi vetëm një zonjë 65-vjeçare vazhdon përgatitjen e nuseve të reja sipas traditave të tyre.

Fytyra e nuses është pikturuar në shumë shtresa të bukura të ngjyrës. Tre rrethet e arta që simbolizojnë ciklet e jetës janë të lidhura me njëra-tjetrën nga rrugët e arta që e kalon gjatë jetës së tyre. Rrethet e brendshme të kuqe janë simbole të pjellorisë dhe e gjithë fytyra është e mbuluar me pika të kuqe dhe të kaltërta, që përçojnë dëshirën dhe urimin për nusen e re që të ketë familje të shëndetshme dhe të lumtur.

Fotografia menjëherë pas publikimit në këtë revistë ka nxitur reagime dhe komente pozitive tek lexuesit gjithandej botës. /KultPlus/

Lajme të ngjashme

Back to top button