Jo çdo informacion në portalet maqedonase mund të transmetohet pa verifikim
Një shkrim tendencioz që transmetohet nga mediat në gjuhën maqedonase, pa asnjë tentim verifikim ose konfirmim. Portali në gjuhën shqipe, që transmeton lajmin jo të plotë dhe tendencioz të portalit “Republika”, nuk ka sjellë asnjë dëshmi plotësuese për tekstin që ka vendosur ta përkthejë dhe publikojë.
Linku deri te artikulli origjinal: Shekerinska ka paguar 2.000 euro natën në villen luksoze në Greqi
Data dhe koha e publikimit: 18.08.2015
Data e recensionit: 20.08.2015
Recensues: Benjamin Arifi
Në tekstin në fjalë nuk ka tentativa për të kontaktuar zv/kryetaren e LSDM-së Radmilla Shekerinska, për t’u përpjekur që nga vetë ajo të mësojë shumën e shpenzimeve për pushimin e saj. Nuk ka tentativë për të marrë reagim për argumentet që ngrihen as nga zyrtarët e LSDM-së. Teksti vetëm transmeton çmime paushalle të publikuara nga “Republika”, edhe pse teksti nuk e përmban as emrin e vilës ku qëndron Shekerinska, e lëre më fakte për çmimet që transmetohen si informacion.
Vila në të cilën ka qenë e vendosur nënkryetarja e LSDM-së opozitare, Radmila Shekerinska, ndërsa gjendet në Detin Jon, është njëra prej më luksozeve në Greqinë Perëndimore. Atje qëndrimi për një ditë në muajin gusht është 2.000 euro, ose për dhjetë ditë çmimi është 18.000 euro, shkruan Republika.
Teksti vazhdon me supozime tendencioze dhe pa fakte, herë të shprehura si konstatime, e herë si pyetje.
Nëse një natë e kaluar e nënkryetares së LSDM-së, Shekerinska kushton 2.000 euro, sa para kushton tërë pushimi i saj? 20.000 euro? 30.000 euro? 40.000 euro? Xhipi, jahti, rrobat e shtrenjta, vila luksoze sot janë pasqyrë e pushimit vjetor të nënkryetares së LSDM-së.
Ky tekst nuk përmban informacione të mjaftueshme relevante për t’u bërë lajm. Autori në mënyrë tendencioze dhe pa fakte tenton të analizojë pushimin e një funksionari opozitarë, ndërkohë që nuk sjellë asnjë informacion ose krahasim për pushimin e funksionarëve në pushtet.
]Tekste të tilla nuk duhen të jenë peng e tendencave negative të medieve të ndryshme. Kur është evidente se një tekst në gjuhën maqedonase ka probleme profesionale, është përgjegjësi e medies që e përkthen dhe publikon atë. Sigurisht që një media mund të niset nga një informacion i një medie tjetër dhe të bëjë hulumtime apo të trajtojë çështje nga këndvështrime të ndryshme.
Pa diskutim se luksi i politikanëve ka interes publik. Por hedhja e një sërë shifrave dhe informacione të pa argumentuara nuk ndihmon publikun të kuptojë atë që synon informacioni i servuar.
