Shkelje me tenderë edhe në Agjencinë Kundër Korrupsionit
Edhe institucioni që thirret për Kundër Korrupsion në Kosovë, ka bërë shkelje në zbatimin e proceduarave të prokurimit.
Për kontraktimin e shërbimeve për “Mirëmbajtjen dhe riparimin e automjeteve”, Zyrtari i prokurimit ka përdorur procedurën më kuotim të çmimeve, edhe pse kontrata e tillë ishte e lidhur sipas çmimeve për njësi kontratë kornizë.
Kështu thuhet të paktën nga Auditori i Përgjithshëm për Agjencinë Kundër Korrupsion.
Sipas auditorit, zbatimi jo adekuat i procedurës së prokurimit, sipas Ligjit të Prokurimit Publik, Autoriteti kontraktues mund të përdorë procedurën e hapur, të kufizuar apo të negociuar për të dhënë një kontratë publike kornizë. Kontrata publike kornizë nuk do të mund të jepet duke përdorur çfarëdo procedure tjetër.
“Për kontraktimin e shërbimeve për “Mirëmbajtjen dhe riparimin e automjeteve‟‟, Zyrtari i prokurimit ka përdorur procedurën më kuotim të çmimeve, edhe pse kontrata e tillë ishte e lidhur sipas çmimeve për njësi (kontratë kornizë)”, thuhet në raportin e ZAP-it, raporton KosovaPress.
Lidhur më këtë çështje, auditori ka dhënë rekomandim në raportin e vitit paraprak. Mirëpo, edhe përkundër zotimit të menaxhmentit për shmangien e praktikës së tillë të prokurimit, ajo është përdorur edhe gjatë vitit 2014.
Sipas auditorit, përdorimi i procedurave joadekuate të prokuri mit e bënë procesin jo transparentë dhe jo konkurrues, si dhe rrezikon kontraktimin e shërbimeve me çmime më të larta nga ato të tregut.
E gjetur tjetër për këtë Agjenci e cila ‘lufton’ korrupsionin, është edhe pranimi i mallrave para zotimit të mjeteve si dhe anashkalimi i kërkesave të përcaktuara më rregulla të thesarit gjatë procedimit të pagesave. “Sipas rregullave të Thesarit, fillimisht duhet të bëhet kërkesa për blerje, zotimi i mjeteve, procedohet urdhër-blerja, pastaj të pranohet malli apo shërbimi, dhe pas pranimit të faturës të ekzekutohet pagesa në fjalë. Në dy pagesa në vlerë 1,718€ (pagesa për mirëmbajtjen dhe riparimin e automjeteve dhe mirëmbajtjen e ndërtesave), zotimi mjeteve është bërë pas pranimit të faturës”, tha ZAP.
Në pesë pagesa tjera në vlerë 11,638€ urdhër-blerja ishte bërë pas pranimit të mallrave dhe faturës. Zyrtari certifikues nuk ka arritur të parandaloj pagesat e lart cekura të cilat nuk ishin në përputhje me rregullat e thesarit. Sipas auditorit hyrja në obligime pa siguruar fondet e nevojshme do të rezultojë në vonesa të implementimit të kontratës dhe rritjen e obligimeve të papaguara, të cilat do të jenë barrë për buxhetin e vitit vijues. Ndërsa, kryerja e pagesave për mallra dhe shërbime para se të përcaktohen kërkesat/nevojat, mund të rezultojë që të pranohen mallra të cilësisë dhe sasisë jo të nevojshme.
Ndër të gjeturat sipas ZAP për AKK-në, është edhe keq klasifikimi shpenzimeve sipas kategorive ekonomike. Gjatë procesit të planifikimit, AKK ka buxhetuar gabimisht një pjesë të shpenzimeve për investime kapitale në kategorinë e mallrave dhe shërbimeve. Më tutje ata nuk kanë marrë masa për transferimin e tyre në kategorinë përkatëse, mirëpo kanë proceduar dhe evidentuar blerjen në kategorinë e mallrave dhe shërbimeve. Kjo është vërejtur te kontrata „‟Blerja dhe vendosja e reklamave të AKK-së‟ në vlerë 3,120€ (billbord në vlerë 1,740€ dhe reklama 1,200€). Sipas ZAP planifikimi dhe realizimi i shpenzimeve në kategori jo adekuate shkakton mangësi në raportimin e shpenzimeve të ndodhura. Kjo ndikon në mbivlerësimin e shpenzimeve në një kategori, kundrejt nënvlerësimit në kategorinë tjetër.
Po ashtu mos raportimi i plote obligimeve të papaguar, është e gjetur tjetër te kjo Agjenci. “Sipas rregullës financiare nr.02/2013/MF për raportimin e obligimeve të papaguara të organizatave buxhetore, OB janë të obliguara që në MF-Thesare ti raportojnë të gjitha obligimet e papaguara. AKK nuk kishte raportuar të gjitha obligimet e papaguara, mirëpo kishte raportuar vetëm obligimet e vonuara për pagesë (faturat të cilat kanë kaluar afatin prej 30 ditësh nga data e pranimit). Megjithatë në PVF ishin prezantuar të gjitha obligimet e papaguara. Raporti jo i plotë i obligimeve mujore ishte si rrjedhojë e paqartësisë së mënyrës së raportimit nga ana e zyrtareve financiar”, thuhet në raport.
Mos raportimi i rregullt i obligimeve të papaguara rrit rrezikun që faturat të mos identifikohen dhe të mos paguhen me kohë. Njëkohësisht, ndaj Institucionit mund të paraqiten ndëshkimet për vonesat në pagesë.
