NATO mbështet kërcënimin amerikan për Sirinë

Sekretari i Përgjithshëm i NATO-s, Anders Fogh Rasmussen thotë se Shtetet e Bashkuara duhet të vazhdojnë kërcënimin për veprime ushtarake kundër Sirisë, për të nxitur marrëveshjen e arritur për armët kimike të atij vendi.

Ndërsa lufta civile siriane përshkallëzohet, kërcënimi për një sulm amerikan me raketa bëri që presidenti Bashar al-Assad të binte dakort të dorëzonte armët e tij kimike.

Kështu që nuk ka arsye për ta hequr këtë kërcënim, thotë Sekretari i Përgjithshëm i NATO-s, Anders Fogh Rasmussen.

“Ishte kërcënimi i besueshëm për veprime ushtarake që lehtësoi procesin politik e që çoi në marrëveshjen ruso-amerikane. Kjo është gjithashtu arsyeja që mendoj se opsioni ushtarak duhet të qëndrojë në tryezë pasi ai lehtëson vazhdimin e procesit politik. “

Duke folur për Zërin e Amerikën në sesionin e Asamblesë së Përgjithshme të OKB-së, zoti Rasmussen bëri thirrje për veprim të Këshillit të Sigurimit për të zbatuar planin për asgjesimin e 1,000 tonelatave lëndë kimike deri në mes të vitit të ardhshëm.

“I bëj thirrje Këshillit të Sigurimit të miratojë një rezolutë të detyrueshme dhe të fuqishme që do të krijojë një kornizë ligjore për eleminimin e verifikueshëm, të shpejtë dhe të sigurtë të të gjitha armëve kimike në Siri. “

Sekretari amerikan i Shtetit John Kerry po kërkon një rezolutë të OKB-së që të përfshijë pasoja, në se Presidenti Assad nuk zbaton marrëveshjen e arritur.

“Është shumë e rëndësishme për komunitetin ndërkombëtar të ngrihet dhe të flasë hapur në mënyrën më të rreptë për rëndësinë e zbatimin të veprimeve për të asgjesuar armët kimike të Sirisë. “

Rusia po bllokon një rezolutë të fuqishme, duke e quajtur atë një përqasje “thellësisht të politizuar”. Zëvendës ministri i jashtëm rus Sergei Ryabkov.

“Pala siriane ka theksuar qartë vullnetin e saj të lirë. Në këtë situate, përpjekjet e amerikanëve, të mbështetura nga anglezët dhe francezët, për të nxitur Këshillin e Sigurimit të hartojë një rezolutë që do të përbënte një rrezik të drejtëpërdrejt ndaj Sirisë duket totalisht e pallogjikshme.”

Zoti Kerry dhe homologu i tij rus Sergei Lavrov thanë se përparimi për armët kimike mund të ndihmojë në arritjen e një tranzicioni politik në Siri.

Por në një intervistë me televizionin kinez, Presidenti Assad duket se i kundërshtoi negociatat me rebelët.

“Çdokush që dorëzon armët, mund të negociojë me ne, pa problem. Gjithashtu ne nuk pranojmë negociata me këdo që pranon ndërhyrje nga jashtë, qoftë kjo ushtarake apo politike.

Përveç këtyre elementëve, ne nuk kemi problem të negociojmë me çdo palë.”

Zyrtarët francezë po thonë se një qeveri e re për Sirinë është e vetmja zgjidhje. Presidenti francez Francois Hollande.

“Bëhet fjalë për organizimin e tranzicionit për një qeveri që do të përfaqësojë të gjitha komunitetet, vullnetin e të gjitha palëve për një Siri të re.”

Presidenti Obama ka premtuar ta mbajë opsionin ushtarak të hapur në se Siria nuk zbaton marrëveshjen.

Lajme të ngjashme

Back to top button