Siri, mbi 300 rebelë të vrarë nga sulmet ajrore të ushtrisë

Të paktën 300 rebelë janë vrarë nga sulmet ajrore të forcave qeveritare siriane, në operacionin për të liruar ushtarët që po mbaheshin të rrethuar në Idlib.

Lajmi është bërë i ditur nga televizioni shtetëror gjatë së dielës, ku thuhej se me dhjetëra trupa ushtarake siriane, të cilat mbaheshin të bllokuara që prej prillit në një spital, janë liruar ditën e premte.

Në operacionin e ndërmarrë nga ushtria kanë mbetur të plagosur me qindra persona në radhët e rebelëve.

Gjatë ditëve të fundit forcat e Asadit kanë shtuar sulmet ajrore edhe ndaj militantëve të ISIS, duke vrarë me dhjetëra e duke plagosur me qindra të tjerë. Gjithashtu në sulmet e javës së kaluar u vranë edhe 5 liderë të Shtetit Islamik në lindje të vendit.