Rama: Maqedonia nuk mund të jetë pjesë e NATO-s
Kryeministri i Shqipërisë, Edi Rama, duke folur për ngjarjet e fundit në Kumanovë, ka thënë se Maqedonia nuk mund të bëhet pjesë e NATO-s pa respektuar Marrëveshjen e Ohrit.
Duke folur në Samitin Rajonal kundër Dhunës Ekstreme, Rama ka dënuar terrorin ndaj shqiptarëve duke thënë se është e patolerueshme që termat “shqiptar” të njehsohet me “terrorist”.
Rama u shpreh se, tragjedia e Kumanovës është shprehje e qartë e degradimit të demokracisë së një vendi.
“Është shumë e rrezikshme përzierja e termave. Termi ‘terrorizëm’ dhe termi ‘shqiptarë’ në Maqedoni u bashkuan dhe kjo është e patolerueshme në një kohë kur shqiptarët kanë qenë, janë dhe do të mbeten një faktor thelbësor shtetformues për Maqedoninë”, ka thënë kryeministri i Shqipërisë.
“Asgjë më e rrezikshme nuk mund të na ndodh të gjithëve ne sesa të ngatërrojmë terrorizmin me etninë. Lufta ndaj terrorizmit duhet të na bashkojë të gjithë popujve të Ballkanit për të qenë një ndaj fenomeni që kërcënon paqen rajonale dhe globale”, ka deklaruar Rama.
Më tej, Rama ka theksuar se, ashtu siç është e patolerueshme bashkimi i termave “shqiptarë” dhe “terrorist”, ashtu do të jetë nga shteti shqiptar e patolerueshme mungesa e transparencës dhe drejtësisë për dëmet dhe terrorin e Kumanovës. Ai ka thënë se, Shqipëria do të mbështesë Maqedoninë në NATO vetëm atëherë kur dhe vendi fqinjë të respektojë plotësisht Marrëveshjen e Ohrit.
Ndërsa më tej gjatë fjalës së tij, kryeministri i ndal tek procesi i integrimit të Ballkanit Perëndimor në Bashkimin Evropian, duke thënë se BE duhet të veprojë pasi nesër mund të jetë vonë. “Duhet të bëjë gjithçka që nesër të mos jetë vonë. Të merret me pasojat dhe jo me shkaqet e atyre që ndodhin”, është shprehur Rama.
Rama ka thënë se vendet e Ballkanit janë më pranë BE-së se sa njëri-tjetrit duke theksuar nevojën e bashkëpunimit rajonal. “Një studim i Observatorit Ballkanik i vitit 2003 thuhet se vendet e Ballkanit janë më pranë me BE-në. Jemi të gjithë më pranë Brukselit se mes veti. Këtë mund ta zgjidhim me bashkëpunim rajonal”, ka thënë Rama.
