AP: Zgjedhje të manipuluara dhe punësime të kurdisura, gjatë vitit 2014

Është rritur numri i ankesave të qytetarëve për mënyrën dhe kushtet në procedurat për punësim si dhe janë konstatuar edhe cenime të të drejtave nga marrëdhënia e punës.

“Shpallen konkurse për pranimin e grupeve të mëdha të personave, mbi baza të ndryshme por jo në organin apo institucionin i cili e shpall konkursin, por me qëllim që të transferohen në organe apo institucione tjera, me ç’rast qytetarët kanë pritur edhe nga 10 muaj. Me këtë dobësohet kapaciteti i institucioneve dhe administrata nuk mund të përgjigjet në mënyrë cilësore dhe efektive nevojave të qytetarëve”, tha Avokati i Popullit, Ixhet Memeti.

Ai gjithashtu konstaton kornizë ligjore joprecize dhe jokonsistetnte e cila çon në probleme gjatë zbatimit të procesi zgjedhor.

“Mungon koordinimi dhe bashkëpunimi i organeve për zbatimin e zgjedhjeve. KSHZ nuk arriti që në kohë dhe në mënyrë kualitative t’i azhurojë të dhënat e Listës së zgjedhësve”, tha Memeti.

Ndërkaq në vitin raportues, Avokati i Popullit veproi sipas 4.995 parashtresave, nga të cilat në periudhën raportuese u pranuan 4249 nga 4331 parashtrues dhe 746 u bartën nga viti paraprak. Numri i lëndëve është rritur për rreth 400 raste për një vit.

Si përfundim janë përmbledhur 1270 cënime të konstatuara, 1186 të përfunduara dhe 92 në punë.