UEFA dhe Politika, turpi dhe padrejtësia!
UEFA qeveria e futbollit evropian e dha vendimin: Shqipëria e humbi ndeshjen në tavolinë me 3:0 nga Serbia. Gjithçka mundë të themi, Skandal, degjenerim, padrejtësi, lajthitje, por gjithsesi fjala më e përshtatshme është Turp për Platinin dhe komisionin e tij të pa-disiplinuar.
Nuk e di se si do të kuptohet, por gjithsesi patjetër ta përziemë politikën, pasi që ky vendim nuk u soll me drejtësi por nga politika.
Nëse keni lexuar histori, gjithsesi ajo që na bie në këtë moment të kujtojmë është viti 1913, e ku atë botë super fuqitë i kishin kënaqur kërkesat e Serbisë duke i dhënë asaj Kosovën, ndërsa nga ana tjetër Çamëria ra në duart e grekut. Dhe ja tani pas shumë viteve, këto fuqi të mëdha po punojnë përsëri në dëm të një Shqipëria, e cila me “takatin” që ka nuk arriti të fitojë edhe kur ishte e rrahur, sharë dhe e nënçmuar nga 32 mijë huligan Serbë dhe ca të tjerë me kollare që ishin në mes të fushës.
Në bazë të vendimit që solli UEFA, i bie se fitues doli vetë UEFA, pasi do të inkasoj së paku 200 mijë EURO në konton e saj, ndërsa këtu përfiton edhe Portugalia dhe Danimarka, qe i afrohen tani Shqipërisë me pikë. Dhe pas kësaj UEFA na bëri me dije se ju mundë të digjni flamuj, bile edhe po të ishte ai i NATO-s, se nuk është problem ai i shtetit fqinj. Dhe pastaj ju mundë ti rrihni futbollistët sa të doni dhe mundë ti poshtëroni duke ua kontrolluar çantat në dalje dhe ju mundi ti ndaloni gazetarët dhe zyrtarët e një shteti edhe para ndeshjes dhe ne vendosim si të thotë POLITIKA dhe jo drejtësia.
Ne mundë ta kishim kuptuar edhe më herët se diçka e keqe do të ndodhë, pasi që deklarata e Michel Platini ishte skandaloze që në fillim të procesit, kur Platini kishte thënë: “në dronin mund të kishte patur dhe bombë!!!”
Edhe pse pritet që FSHF të apelojë kundër këtij vendimi, mendoj se ndryshim nuk do ketë, pasi këtu është një gjë e qartë, se Evropa me çdo kusht do ta fusë Serbinë në Europë, po edhe nëse këpucët i ka pa lustruar dhe me baltë e edhe nëse serbëve as që u bëhet vonë për Europën pasi ata e duan Rusinë. Ndërsa ne shqiptarët që e kemi gojën plot duke thënë se duam të shkojmë nga Perëndimi, mbesim para dyerve të saj dhe presim që të gjykohet vetëm drejt, që asnjë herë nuk po ndodh.